Sámi allaskuvlla ja Universitetet i Innlandet professor Hege Merete Somby galgá jođihit barggu ráhkadit ođđa oktasaš rámmaplána sámi oahpaheaddjeoahpuide. Máhttodepartemeanta lea nammadan bargojoavkku.

Ođđa rámmaplána boahtá golbma sámi oahppoplánaid sadjái, ja galgá gusttot buot allaskuvllaide ja universitehtaide Norggas mat fállet Sámi oahpaheaddjeoahpu. 

Somby dadjá ahte lea buorre go sámi oahpaheaddjeoahput ožžot sierra rámmaplána vai buorebut sáhttit sihkkarastit sámi kulturipmárdusa sámi oahpaheaddjeoahpuin. 

– Mun illudan jođihit dán barggu bargojoavkkuin mii viidát ovddasta iešguđetge sámi giellaguovlluid, ásahusaid ja dásiid oahppovuogádagas. Mis leat maid hárjánan olbmot čállingottis geat leat bargan sullasaš proseassaiguin ovdal. 

– Departemeanta lea bargan buori barggu go vuoruhit sierra rámmaplána sámi oahpaheaddjeoahpu ja go leat čohkken ná viiddis bargojoavkku áimmahuššat iešguđet dárbbuid mat sámi oahpaheaddjeoahpus leat, dadjá Somby. 

Ii boahtán nuvttá dán háve ge

Sámi allaskuvlla bealis leat maid Inger Ellen Johansdatter Eira Gaup, Nils Ailo Anti ja Laila Aleksandersen Nutti bargojoavkkus.

Eira Gaup mielas lea hui buorre go ráđđehus mannan dálvvi mearridii bidjat johtui sierra bargojoavkku hábmet bajit dási rámmaplána sámi oahpaheaddjeoahpuide, muhto lasiha ahte dát ii boahtán nuvttá dán háve ge. 

– Sámi allaskuvla ovttas Sámedikkiin gárttai  áŋgiruššat ja gulahallat máhttodepartemeanttain máŋgii dán proseassas ovdal. Sámi allaskuvllas mii diehtit ahte buot oahpaheaddjeoahpporeforpmain mat leamaš Norggas, lea leamaš dárbu loktet ja muittuhit sámi oahpaheaddjeoahpuid sierra dárbbuid. 

Eira Gaup lei mannan jagi láhttun NRLU 2025 ráđis (Nasjonalt råd for lærerutdanning 2025) go ráđđi barggai hábmet bajit dási rámmaplána dáru oahpaheaddjeoahpuide.

– Lei hui miellagiddevaš bargu, ja dál illudan bargagoahtit sámi oahpaheaddjeoahpuid ektui. Ođđa rámmaplána addá vejolašvuođa eanet oahpaheaddjeoahpuid hábmet sámi rámmaplána vuođul, dadjá Eira Gaup. 

Áidná studeanta

Nils Ailo Anti lea studeanta Allaskuvllas, ja lea áidna studeanta gii lea válljejuvvon bargojovkui. 

– Oažžut vejolašvuođa bargat ođđa oktasaš rámmaplánain sámi oahpaheaddjeoahpuide lea munnje stuorra gudnin. Dat čájeha ahte Sámi allaskuvla guldala sámi studeanttaid, ja ahte Sámi allaskuvla háliida sámi oahpaheaddjeoahput ovdánahttojuvvot ovttas sámi oahpaheaddjestudeanttaiguin, dadjá Anti.

Dasa lassin lea Lohkanguovddáža jođiheaddji Karen Inga Eira válljejuvvon čállingoddái. 

Oktasaš rámmaplána sámi oahpaheaddjeohppui galgá, mandáhta mielde, deattuhit ja nannet oahpaheaddjeprofešuvnna searvevuođa.

Plána váldooassi galgá čilget ulbmiliid, árvvuid ja guovddáš gelbbolašvuođa mii galgá leat oktasaš buot oahpaheddjiide geat leat čađahan sámi oahpaheaddjeoahpu, ja dan mii lea earenomáš ja mii ii guoskka buohkaide, galgá fuolahuvvot rámmaplána vuolitkapihttaliin, daddjojuvvo.

Eambbo dieđut