Sámi allaskuvla lea njunuš eamiálbmotásahus man ovddasvástádussan leat oahpahus- ja dutkandoaimmat, gulahallan ja ovttasdoaibman birastahtti servodagaiguin.  

Sámi allaskuvlla rájáhis oahput, dutkamušat ja doaimmat nannejit ja ovdánahttet sápmelaččaid iešmearrideami, sámegielaid ja árbevirolaš máhtu seailluheami. Allaskuvla váldá servodatovddasvástádusa man bokte láhčá sámi servodagaide, ealáhusaide ja kultuvrii suvdilis boahtteáiggi ja geabbilis máhttosirdima ođđa buolvvaide.

Háliidat go don váldit oasi dán servodatovddasvástádusas? Oza barggu Sámi allaskuvlii! Mii dárbbašit du gelbbolašvuođa.

Rabas virggit

Rabas virggit almmuhuvvojit Jobbnorge.no:s
Sámi allaskuvla geavaha jobbnorge.no vuogádaga virgealmmuhusaide. Doppe sáhttá ohcat virgealmmuhusaid moatti gillii.

Jobbnorge.no neahttasiiddus ásaha bargoohcci profiilla gosa vurke ohcamušaid, CV ja bargo- ja oahppoduođaštusaid. Gulahallan gaskal bargoohcci ja bargoaddi dáhpáhuvvá jobbnorge-vuogádagas dassažii virgáibadjan lea leamaš. Jus háliidat geahčestit leat go mis dál almmuhuvvon rabas virggit, de sáhtát čuovvut dán liŋkka jobbnorge neahttasiidui.

 

 

Oahpahus- ja dutkivirggiid virgáidanproseassat

Váldonjuolggadus lea ahte buoremus kvalifiserejuvvon ohccái fállojuvvo virgi, jus eará láhka dahje láhkaásahus ii daja maidege eará. Árvvoštallamis deattuhuvvo oahppu, hárjáneapmi/vásáhusat ja persovnnalaš heivvolašvuohta, oktan gelbbolašvuođagáibádusaiguin mat virgealmmuhusas ovdanbohtet (gč stádabargiidlága §3). Dasa lassin bidjá Universitehta- ja allaskuvlaláhka (U/A-láhka) sierra gáibádusaid fágalaš árvvoštallamiidda.

Áššedovdilávdegotti árvvoštallan
Oahpahus- ja dutkivirggiid virgáibidjanproseassain gáibiduvvo ahte áššedovdilávdegoddi nammaduvvo, mas mandáhta lea árvvoštallat kandidáhtaid fágalaš máhtu. Lávdegoddi dahká iežas árvvoštallama oahpahus- ja dutkivirggiid virgeloktema láhkaásahusa, Sámi allaskuvlla siskkáldas njuolggadusaid ja virgealmmuhusa gelbbolašvuođagáibádusaid vuođul. Áššedovdilávdegoddi vuoruha kanditáhtaid vuorroortnega mielde ja sin árvvoštallan lea vuođđun árvalussii mii ovddiduvvo virgáibidjanorgánii, gč U/A lága § 7-3 (2).

Áššedovdilávdegoddi árvvoštallá dušše dokumentašuvnna mii lea sáddejuvvon virgeohcamušain. Danin lea nu dehálaš ahte bijat buot mildosiid jobbnorge.no portálii go ozat. Dokumentašuvdna mii gáibiduvvo, lea:

• CV- ja oahppoduođaštusat
• Ollislaš publikašuvdnalistu
• Relevántta publikašuvnnat
• Dokumeterejuvvon oahpahanfágalaš gelbbolašvuohta/ pedagogalaš máhppa
• Eará relevántta duođaštusat, omd. bargoduođaštusat jna.

Virgealmmuhusat leat dávja lagat čilgehusat makkár dokumeanttašuvnna galggat sáddet. 

Lávdegotti árvvoštallan galgá gárvvis golbma mánu sisa maŋŋel go ožžo ohcciid materiála.

Árvvoštallan sáddejuvvo dasto ohcciide ollislaččat ja ohcciide addo 14 beaivvi áigemearri buktit cealkámuša áššedovdilávdegotti árvvoštallamii. Jus oktage buktá cealkámuša árvvoštallamii, de addo áššedovdilávdegoddái diehtu dán birra ja oažžu vejolašvuođa kommenteret dahje rievdadit árvvoštallama.

Áššedovdilávdegotti árvvoštallan ii leat almmolaš dokumeanta, almmolašvuođalága § 25 vuosttaš lađđasa vuođul, ovdal virgáibidjanlávdegoddi lea meannudan ášši. Ohcciide addo diehtu jobbnorge.no bokte, go árvvoštallan sáddejuvvo sidjiide, ahte sis lea geatnegahtton jávohisvuohta gitta ášši lea meannuduvvon virgáibidjanorgánas.

Oahpahanfágalaš gelbbolašvuođa duođašteapmi
Buot ohccit oahpahan- ja dutkanvirggiide galget iežaset ohcamis duođaštit iežaset oahpahanfágalaš gelbbolašvuođa. Ohccis leat guokte vuogi dokumenteret pedagogalaš vuođđogelbbolašvuođa:

• Duođaštus čađahuvvon universitehta- dahje allaskuvlapedagogalaš prográmmas mii vástida unnimusat 200 diimmu (oktan kursa- /eksámenduođaštus ja oahppoplána)

dahje

• Pedagogalaš máhppa mas lea systemáhtalaččat čohkkejuvvon dokumentašuvdna sihke relevántta kurssain ja iežas praktihkalaš oahpahusas ja bagadallamis, mii oktiibuot lea vástideaddji prográmmii namuhuvvon ovddit čuoggas.

Loga dás eambbo pedagogalaš vuođđogelbbolašvuođa ja pedagogalaš máhppa birra.

Jearahallamat, geahččalanlogaldallamat ja referánsajearahallamat
Maŋŋel go áššedovdilávdegoddi lea buktán cealkámuša, de bovdejuvvojit ohccit geat leat árvvoštallon eanemus gelbbolažžan, jearahallamii. Jearahallama ulbmil lea čielggadit persovnnalaš dohkálašvuođa virgái, motivašuvnna ja ovdánanpotensiála daid iešguđet bargodoaimmaid hárrái mat gullet virgái. Ohccit sáhttet maiddái bovdejuvvot doallat geahččalanlogaldallama/geahččalanoahpaheami/ geahččalančájálmasa. Sámi allaskuvla váldá oktavuođa referánssaiguin maid kandidáhtta lea almmuhan ohcama bokte.

Go lagamus hoavda lea buktán iežas árvalusa/evttohusa virgáibidjamii, de loktejuvvo ášši virgáibidjananorgánii, FVO:ii. Dás gávnnat dieđuid lávdegotti birra. Lea virgáidanorgána mii váldá mearrádusa virgáidanáššiin. 

Sámi allaskuvlla kvalifikašuvdnagáibádusat dieđalaš virgekategoriijaide

Sámi allaskuvlla kvalifikašuvdnagáibádusat dieđalaš virgekategoriijaide.