Vuosttašamanueansa Berit-Ellen Juuso Sámi allaskuvllas lea ožžon Kindred Peoples Programme komitea bálkkašumi kategoriijas dutkan mii lea almmuhuvvon urálalaš gillii iežas nákkosgirjin «Jietnadagas bustávvii – bustávas jietnadahkii: Sámegielat álgooahpahusa ohppiid teknihkalaš lohkandáidu». 

Juuso muitala ahte son lei hui movttet ja rámis go oaččui dieđu bálkkašumis. 

– Lean issoras ilolaš ja giitevaš dán dovddastusas. Dat mearkkaša hui olu, danne go bálkkašupmi čalmmustahttá sámegielat oahpahusa ja dutkama dehálašvuođa. Bálkkašupmi nanne maid dovddu ahte oahpahus- ja dutkanbargu adnojuvvo árvvus, ja dat oažžu fuomášumi maiddái viidábut, dadjá Juuso. 

Jury čállá ahte Juuso nákkosgirji čalmmustahttá dehálaš olahusa suoma-ugralaš dutkamis go lea okta vuosttaš doavttergrádadutkamušain mii lea čállojuvvon ja bealuštuvvon davvisámegillii. 

– Dutkanbargu gáibidii vuđolaš ovdánahttima ja reflekterema davvisámegielat akademalaš terminologiija birra. Juuso lea hirpmástuhtti láhkai kombineren akademalaš analysa alla dásiin ulbmiliin seailluhit ja ovddidit davvisámegiela, čállá jurylahttu Sven-Erik Soosaar Kindred Peoples Programme neahttasiiddus. 

Jurylahttu Marju Kõivupuu oaivvilda gis ahte Juuso bargu movttiidahttá ja lea ovdagovvan eamiálbmotgielaid dutkamis boahtteáiggis 

– Son lea čeahpes vugiin ovttastahttán gielladieđa, pedagogihkka ja kultuvrralaš áddejumi, ja son lea nana dáistaleaddji eamiálbmotmánáid dásseárvosaš oahpahusa ovddas.

Komitea lea 2012 rájes juohkán bálkkašumiid gudnejahttin dihte erenomáš buori dutkanbargguid mat leat čađahuvvon urálalaš álbmogiid geain ii leat sierra stáhtat ovddasteddjiin. Maiddái komi-dutki Maria Fedina oaččui bálkkašumi iežas nákkosgirjji «Place, Language, and Belonging: Being Komi in Contemporary Syktyvkar, Komi Republic» ovddas. 
 

Loga eambbo dás.