Morrašin leat mii vuostáiváldán dieđu ahte Sámi allaskuvlla stivralahttu Ellen Inga O. Hætta jámii guovvamánu 22.beaivvi 2023. Ellen Iŋgá lea leamaš Sámi allaskuvlla stivralahttu 2008-2011 áigodagas ja dasto fas 2015 rájes otnážii, departemeantta nammaduvvon stivralahttun.

Mii muitit Ellen Iŋggá giitevašvuođain go nu árjjalaččat lei fárus allaskuvlla stivrabargguin. Muđui lei son maid sámi servodagas áŋgirit fárus sihke politihkas ja servodatdigaštallamiin báikkálaš ja riika dásis. Ellen Iŋgá beroštii erenoamážit sámi oahpahusáššiin ja lea bargan iešguđet sámi ásahusain oahpahusa ovddidemiin.

Sámi allaskuvllas váldit oasi Ellen Iŋggá isida, mánáid ja eará lagasolbmuid morrašis.