Lunšakonsearta Elina Ijäs

Oahppojagi almmolaš rahpama oktavuođas doallá Elina Ijäs lunšakonseartta kantiinnas.

Elina Ijäs lea nuorra artista ja lávllačálli gii lea bajásšaddan Guovdageainnus, ja geas leat ruohttasat Gáivuonas. Elina lea lávlon ollu lávddiin sihke Sámis ja olggobeal Sámi, ja lea maid almmuhan ollu musihka, sihke ovttas earáiguin ja iežas soloprošeavttain. 

Elina Ijäs čállá rehálaš ja poehtalaš lávlagiid, ja juogada sihke rašes dovdduid ja čielga oaiviliid iežas eatnigillii, davvisámegillii. Giella lea sutnje earenomáš dehálaš, ja lea maid lunddolaš čállit musihka sámegillii ja nu doalahit giela ealasin.

Čakčat lea son almmuheamen iežas vuosttaš EP – Luoitte, mas beassat gullat oasáža dán konsearttas.

Govven: Ørjan Marakatt Bertelsen