Go don leat studeanta sámi oahpaheaddjeoahpuin, de hárjehallan lea dehálaš oassi du oahpus. Hárjehallamiin don leat oahpahallame oahpaheaddjeámmáha dego livččet duohta bargodilis mánáidgárddis, vuođđoskuvllas dahje joatkkaskuvllas.

• Iskka hárjehallanoahpahusa rámmaid mat gusket du ohppui. Dieđuid gávnnat maiddái du prográmmaplánas ja fágaplánain.

Hárjehallanmánáidgárddit ja hárjehallanskuvllat

• Hárjehallanoahppu čađahuvvo skuvllain ja mánáidgárddiin maiguin Sámi allaskuvllas lea hárjehallanšiehtadus dahje verddešiehtadus. Hárjehallanšiehtadus lea vuođđun hárjehallanoahpu ovttasbargui ja oahpu ulbmila ollašuvvamii.
• Ovttasbarggu guovddážis lea oahppokvalitehta ja oahpaheaddjestudeanttaid oahppanjoksosat.
• Hárjehallanoahppu ráhkkanahttá studeanttaid oahpaheaddjeámmáhii bargovásáhusaid ja reflekterema bokte, bagadallama ja árvvoštallama vehkiin. Hárjehallanoahpus lea ollisvuohta ja oktavuohta oahppanarenaid gaskkas ja searvvaha studeanttaid, hárjehallanbáikki eaiggádiid, jođiheddjiid, hárjehallanoahpaheddjiid ja oahppoásahusa fágabirrasa. Olles hárjehallanskuvla ja hárjehallanmánáidgárdii lea oahppanarenan.

Hárjehallamiid giehtagirji

• Oahpaheaddjeoahput hárjehallamiid giehtagirji 2026 rájes
• Giehtagirjái leat čohkkejuvvon dieđut, njuolggadusat ja rávvagat mat gusket hárjehallanoahpu praktihkalaš čađaheapmái.
• Oahpaheaddjeoahpuid našunála láhkaásahusat, rámmaplánat ja njuolggadusat leat báikkálaččat heivehuvvon Sámi allaskuvlii ja sámi oahpaheaddjeoahpuide.
• Giehtagirji lea hábmejuvvon šiehtadusaid vuođul mat gusket verddeskuvllaide, verddemánáidgárddiide, hárjehallanmánáidgárddiide ja hárjehallanskuvllaide ja dáid ovttasbargui Sámi allaskuvllain.
• Giehtagirji lea buohkaid váste geain lea dahkamuš hárjehallanoahpuiguin, nu go oahpaheaddjestudeanttaid, fágaoahpaheddjiid, hárjehallanoahpaheddjiid, rektoriid, mánáidgárdejođiheddjiid ja earáid geat dárbbašit dáid dovdat.

Politiijaduođaštus

Forskrift til universitets- og høyskoleloven, kapihttal 6, vuođul gáibiduvvo politiijaduođaštus ee. oahpuin gos studeanttain lea hárjehallamis ja lea oktavuohta vuolleahkkásaš mánáiguin. 

• Ulbmil dáinna lea ahte sihkarasttit ahte studeanttat guhtet leat oktavuođas mánáiguin ja nuoraiguin eai galgga leat áššáskuhtton dahje dubmejuvvon relevánta láhkarihkkumiin.
• Fuomáš ahte studeanta ii sáhte vuolgit hárjehallamii ovdal lea buktán politiijaduođaštusa.

Movt mun ozan politiijaduođaštusa?

Norgga ássiide lea álkkimus lea ohcat StudentWeb bokte, de it dárbbat bidjat mielddusin ulbmilčilgehusa ja oahpposajifálaldaga.

• StudentWebas deaddilat "Mer/More", váljje "Bestillinger/Orders" ja "Politiattest/ Police cerfificate".
• Jus it sáhte ohcat StudentWebas, de ane Politiija digitála čovdosa dahje oza e-boasta bokte. Loga eanet dáppe: Søk om politiattest for privatpersoner - Politiet.no.
• Politiijaduođaštus sáddejuvvo dutnje digitála poastakássii dahje dábálaš boasta mielde.

Olgoriikka ássit ohcet politiijaduođaštusa iežaset riikkas: 

• Ruoŧas: Belastningsregistret - begära utdrag | Polismyndigheten
• Suomas: Otteet lasten kanssa toimimiseen - Oikeusrekisterikeskus

Goas galggat buktit politiijaduođaštusa?

Don buvttát politiijaduođaštusa maŋŋel go leat ožžon oahpposajifálaldaga. Lagat áigemearri vuolgá das ahte leat go dus mearkkašumit politiijaduođaštusas vai eai: 

• Jus dus eai leat mearkkašumit, fertet buktit dan maŋemusat go oahppu álgá.  
• Jus dus leat mearkkašumit, fertet buktit duođaštusa maŋemusat 3 vahkku maŋŋel go ožžot oahppofálaldaga. 

Buktit politiijaduođaštusa:

Politiijaduođaštus ii galgga leat boarrásit go golbma (3) mánu go buvttát dan.

Mii eat ávžžut sáddet politiijaduođaštusa e-boasta bokte. Don sáhtát butkit dán ná:

• elektuvnnalaččat dán skovi bokte: Doavtterduođaštusa dahje eará duođaštusa buktin
• fysalaččat buktit dan oahppohálddahussii

Jus leat mearkkašumit:

• Jus dus leat mearkkašumit politiijaduođaštusas, de it soaitte beassat hárjehallamii ja sáhtát olgguštuvvot oahpus.
• Fuomáš ahte eai buot mearkkašumit leat relevánta du ohppui. Mii váldit duinna oktavuođa jus mearkkašumiin lea relevánsa.
• Váiddaváldegoddi (studeantaáššiid lávdegoddi) mearrida jus mearkkašupmi gáibida ahte studeanta olgguštuvvo oahpus vai ii.
• Don oaččut čálalaš várrehusa jus ášši ovddiduvvo váiddalávdegoddái. Dus lea maid vuoigatvuohta buktit cealkámuša, ja Universitehta- ja allaskuvlalága § 12-9 mielde lea dus vuoigatvuohta advokáhtagoluid oažžut gokčojuvvot dan rájes go mearriduvvo ahte ášši ovddiduvvo váiddalávdegoddái.

Movt dieđán ahte lean buktán politiijaduođaštusa?

• StudentWebas galgá ihttit diehtu go du politiijaduođaštus lea registrerejuvvon, geahča "Meldinger" vuolde.
• Diehtu ii iđe ovdal leat máksán lohkanbadjedivvada ja dohkkehan oahpahusplána.

Geahča politiijaduođaštusa láidehusa: Veileder for krav om politiattest for studenter i høyere utdanning og høyere yrkesfaglig utdanning

Dohkálašvuođaárvvoštallan

Buot oahpaheaddjeoahpuin galgá dahkkot dohkálašvuođaárvvoštallan das ahte leat go studeanttas fágalaš ja persuvnnalaš eavttut mat dárbbahuvvojit studeret ja doaibmat oahpaheaddjeámmáhis. 

• Dohkálašvuođaárvvoštallan lea vuođđuduvvon Universitehta- ja allaskuvlalága § 12-3 ja Universitehta- ja allaskuvlalága láhkaásahusa kap. 7:s.
• Árvvoštallan galgá mearridit ahte sáhttá go studeanta dagahit vejolaš vára heakka ovdii, fysalaš ja psyhkalaš dearvvašvuođa ovdii, rivttiid ja sihkarvuođa ovdii mii guoská mánáidgárdemánáide, ohppiide dahje earáide geaiguin studeanta boahtá leat oktavuođas hárjehallamis dahje boahttevaš virgedoaimmas.
• Dohkálašvuohta galgá jotkkolaččat árvvoštallojuvvot olles oahpu áiggi, ja sihke hárjehallan ja eará oahpahusdilálašvuođat leat dehálaš arenat dása.
• Sihke fágaoahpaheddjiin, hárjehallanoahpaheddjin ja earáin geain lea dahkámuš studeanttaiguin, lea ovttasvástádus čuovvut mielde studeanttaid dohkálašvuođas.

Dáppe leat eanet dieđut dohkálašvuođaárvvoštallama birra: Dohkálašvuođaárvvoštallan | Sámi allaskuvla

Personsuodjalus hárjehallamis 

Siidu ii leat gárvvis 

Orrun- ja mátkegolut 

Siidu ii leat gárvvis 

Vahát hárjehallamis

Siidu ii leat gárvvis