Duopmostuoluid Sámi forum lágiida našunála seminára Diehtosiiddas
Duopmostuoluid Sámi forum lágiida našunála seminára Sámi kultuvrra, riekteoainnu, ealáhusa, ja servodateallima birra davvisámi guovlluin duorastaga golggotmánu 9. beaivvi.
– Seminára lea okta máŋgga doaibmabijus nannendihte duopmostuoluid gelbbolašvuođa sámi áššiid ja sámi riektesihkkarvuođa birra, lohkká duopmostuoluid Sámi foruma jođiheaddji Nils Asbjørn Engstad.
Dát bargu lea leamaš jođus guhká, dadjá Engstad. 2010s čielggadii bargojoavku, man Duopmostuolu hálddáhus lei nammadan, iešguđetge doaimmaid maiguin nannet Sámi riektesihkkarvuođa, ja Sámi foruma ásaheapmi duopmostuoluin lei boađus dán bargojoavkku raporttas.
Sámi forum duopmostuoluin lea 10 jagis evttohan iešguđetge doaibmabijuid, ja lea earet eará ráhkadahttán neavvungihppaga sámi áššiid gieđahallamii duopmostuoluide. Seminára mii dál lágiduvvo Guovdageainnus, lea joatkka ovddit sullasaš semináras maid Sámi forum diibmá lágidii Ájluovttas regionála dásis, duopmáriidde ja eará mielbargiide duopmostuoluin julevsámi guovlluin. Jagi ovdal ges Plaasjas duopmáriidde ja eará mielbargiide lullisámi guovlluin. Dán jagi čađahuvvo našunála seminára ovttas Sámi allaskuvllaini miellagiddevaš prográmmain.
Seminára ulbmiljoavku leat duopmostuollojođiheaddjit, duopmárat ja Finnmárkokomišuvnna bargit. Dasa lassin servet maid duopmárfámohasat máŋga iešguđet duopmostuoluin.
Semináras leat 15 ovddastuvvon duopmostuolu, ja maiddái eará ovttasbargoguoimmit, ja vel dasa lassin hui buori logaldallit, de mus lea jáhkku ahte šaddá hui buorre ja miellagiddevaš seminára, loahpaha Nils Asbjørn Engstad.
– Sámi allaskuvlii lea dehálaš lágidit dán seminára ovttas Duopmostuolu hálddáhusain, ja ahte mis lea čielga fokus sámegillii, kultuvrii ja servodatipmárdussii norgga riekteásahusas. Lea maid dehálaš ahte sámi fáttát ja sámi perspektiivvat aktiivvalaččat fátmmastuvvojit seanadanproseassain maŋŋel Duohtavuođa- ja seanadankomišuvnna guorahallama máŋga čuođi jagi dáruiduhttima váikkuhusaid, lohká Sámi allaskuvlla rektor Liv Inger Somby.
Seminárii čoahkkanit lagabui 60 oasseváldi ja logaldalli.
