VSAM-6102 Sámegiela ja girjjálašvuođa dutkan ja oahpahus dál ja ovdal – joatkkaoahppun vuođđoskuvlaoahpaheddjiide
Dá lea joatkkaoahppu fálaldat oahpaheddjiide geain lea juo 60 oč sámegielas ovdalaččas, ja geat háliidit lassi gelbbolašvuođa hukset sámegiela ja sámi girjjálašvuođa fágasuorggis.
- Oahppočuoggá: 25
- Diibmoplána ja deaivvadanplána: Time Edit
- Oahppoáigi: Ovtta lohkanbaji
- Oahpu lágideapmi: Neahttadoarjjaoahpahus: Oahpus leat sihke fysalaš deaivvadeamit Sámi allaskuvllas ja neahttaoahpahus. Fysalaš deaivvademiid ii leat vejolaš čuovvut neahta bokte
- Oahpahusgiella: Davvisámegiella
- Ohcanwebas: Vállje 6026
- Sisabeassangáibádusat
- Čađahuvvon oahpaheaddjeoahppu mii addá gelbbolašvuođa oahpahit vuođđoskuvllas.
- Unnimusat 60 oč sámegiella oassin oahpaheaddjeoahpus dahje 60 oč sámegiella sámegiela ja sámi girjjálašvuođa bacheloroahpus dahje vástideaddji oahpus.
- Sisdoallu
Oahpus čiekŋut sámegiela ja sámi girjjálašvuođa dutkama ja oahpahusa ovddit ja dálá diliide. Oahpus guorahallat dieđalaččat sámegiela fága ja fágadidaktihkalaš dieđalaš lahkonanvugiid ja vuodjut sámegiela sierra surggiid fágalaš čuolbmaásahemiide ja fága guovddáš oahpahus- ja dutkanulbmiliidda. Oahppu gidde fuomášumi dutkamušaide main oahpaheaddjit servet dutkamii ja geabbilis oahpahusmálliide mat ovddidit sámegiela ja -girjjálašvuođa oahpahusa ođđa vugiid mielde.
Dán oahppoovttadagas leat golbma oasi, main leat čuovvovaš fáttát:
- Giella (5 oč)
- Sámegiella ja -fága historjjálaš perspektiivvas (2 oč)
- Sámegiela oahpahus ođđa vugiid mielde (3 oč)
- Lohkan ja čállin ( 1 oč)
- Lohkan- ja čállindutkamuš
- Girjjálašvuohta ja teakstadáiddut (4 oč)
- Girjjálašvuođa dutkan ja oahpahus dál ja ovdal
- Gáibádusat beassat eksámenii
Čuovvovaš gáibádusat leat eaktun beassat eksámenii:
Oassálastit 80 % lágiduvvon oahpahussii deaivvademiin ja neahttaoahpahusas.
Čállit oahppanlogga oahpahusa vuođul.
- Čállit 5-6 siiddu fágalaš reflekšuvdnačállosa. Studeanta vállje bargui fáttá (gielas, lohkamis/čállimis dahje girjjálašvuođas) ja dasa heivvolaš lohkanmeari. Fágaoahpaheaddji dohkkeha fáttá ja lohkanmeari. Bagadallan lea oktagaslaš barggu oassin.
- Ovdanbuktit čállosa oktasaš semináras.
Gáibádusat árvvoštallojuvvojit dohkkehuvvon/ii dohkkehuvvon.
- Eksámen
Eksámen lea oktagaslaš čálalaš ruovttueksámen, man guhkkodat leat 10-15 siiddu. Čállinbarggus árvvoštallojuvvo čehppodat máhttit hábmet čálalaš dieđalaš barggu sámegillii.
Árvosátni eksámenis addojuvvo ECTS vuogádaga mielde, mas A lea buoremus árvosátni ja E lea vuolimus ceavzinárvosátni. Árvosátni F mearkkaša ahte ii leat ceavzán.
