VSAM-6101 Fágadidaktihkalaš čiekŋudeapmi sámegielas – joatkkaoahppun vuođđoskuvlaoahpaheddjiide
Dá lea joatkkaoahppu fálaldat oahpaheddjiide geain lea juo 60 oč sámegielas ovdalaččas, ja geat háliidit lassi gelbbolašvuođa hukset sámegiela didaktihkas.
- Oahppočuoggá: 15
- Diibmoplána ja deaivvadanplána: TimeEdit
- Oahppoáigi: Ovtta lohkanbaji badjel
- Oahpu lágideapmi: Neahttadoarjjaoahpahus: Oahpus leat sihke fysalaš deaivvadeamit Sámi allaskuvllas ja neahttaoahpahus. Fysalaš deaivvademiid ii leat vejolaš čuovvut neahta bokte
- Oahpahusgiella: Davvisámegiella
- Ohcanwebas: Vállje 6025
- Sisabeassangáibádusat
- Čađahuvvon oahpaheaddjeoahppu mii addá gelbbolašvuođa oahpahit vuođđoskuvllas.
- Unnimusat 60 oč sámegiella oassin oahpaheaddjeoahpus dahje 60 oč sámegiella sámegiela ja sámi girjjálašvuođa bacheloroahpus dahje vástideaddji oahpus.
- Sisdoallu
Oahppoovttadaga ulbmilin lea, ahte studeanta vállje fáttá mas guorahallá ja čiekŋuda sámegielfága fágadidaktihkas. Čiekŋudeapmi sáhttá fátmmastit earret eará giellaoahppafáttáid ja oahpahusvugiid, maid bokte oahpaha vuosttaš- ja nubbigiela máhtu ja dáidduid. Čiekŋudeapmi sáhttá fátmmastit lohkan- ja čállinoahpahusa oahpahusvugiid. Dahje čiekŋudeapmi sáhttá deattuhit girjjálašvuođafáttáid ja girjjálašvuođa geavaheami oahpahusas. Studeanta oahpásnuvvá riikkagielat ja riikkaidgaskasaš girjjálašvuhtii.
Studeanta čiekŋuda ja heiveha dieđus máŋggagielat ja eatnigielat ohppiid oahpaheamis. Studeanttat hárjehallet dan, mot váldit vuhtii ja heivehit oahpahusas ohppiid lohkan- ja čállinmáhtu vuođul.
- Gáibádusat beassat eksámenii
Čuovvovaš gáibádusat leat eaktun beassat eksámenii:
- Gáibiduvvo ahte studeanttat oassálastet 80 % lágiduvvon oahpahussii deaivvademiin ja neahttaoahpahusas.
- Čállit oahppanlogga oahpahusa ja girjjálašvuođa vuođul.
Studeantta iešheanalis oktagaslaš bargu: Studeanta vállje bargui fáttá (gielas, lohkamis/čállimis dahje girjjálašvuođas) ja dasa heivvolaš lohkanmeari. Fágaoahpaheaddji dohkkeha fáttá ja lohkanmeari. Studeanta čállá čállosa, guhkkodat lea 5-6 siiddu. Studeanta ovdanbuktá čállosa oktasaš semináras.
- Studeanta galgá kommenteret mielstudeanta ovdanbuktima.
Bagadallan lea oktagaslaš barggu oassin.
Barggut árvvoštallojit dohkkehuvvon/ii dohkkehuvvon.
- Eksámen
Oktagaslaš ruovttueksámen (10–15 siiddu), mas studeanta bargá viidáset geatnegahtton bargguin. Čállinbarggus árvvoštallojuvvo čehppodat máhttit hábmet čálalaš dieđalaš barggu sámegillii.
Árvvoštallan ECTS-vuogádaga mielde: Árvosánit A–F.
