SER-1100 Duohtavuohta ja soabadeapmi
Oahppofálaldat addá studeanttaide dieđu ja máhtu Norgga, Suoma ja Ruoŧa beale duohtavuođa- ja soabadankommišuvnnaid barggu ja gávdnosiid birra, sihke ovdalaš, dálá áiggi ja boahtte áiggi beliid hárrái. Oahppu lea ráddjejuvvon sámi álbmoga guoskevaš áššiide. Studeanttat maid ohppet mo Norgga stáhta bajimus eiseváldin lea áigumuš čuovvulit raportta, ja oahpásnuvvet maiddái eará riikkaid duohtavuođa- ja soabadanproseassaide.
- Oahppočuoggá: 10
- Diibmoplána ja deaivvadanplána: TimeEdit
- Oahppoáigi: Ovtta lohkanbaji badjel
- Oahpahan- ja oahppanvuogit: Neahttaoahpahus
- Oahpahus- ja eksámengiella: Davvisámegiella
- Ohcanwebas: Vállje 4040
- Sisabeassangáibádusat
- Dábálaš sisabeassangáibádusat alitoahpahussii. Sisabeassanvuođđu sáhttá leat juogo oppalaš lohkangelbbolašvuohta (čađahan joatkkaskuvlla/logahaga/gymnása) dahje reálagelbbolašvuohta. Oppalaš lohkangelbbolašvuođa gáibádusat olgoriikkaohcciide bohtet ovdan GSU-listtus.
- Davvisámegielmáhttu.
Sámegiela gáibádusa sáhttá deavdit čuovvovaš vugiid mielde: Norgga joatkkaskuvllas sámegiella 1. dahje 2. giellan 2, Suoma logahagas eatnigielladutkkus dahje lohkan sámegiela vierrogiellan ja Ruoŧa gymnásas eatnigiellan (modersmål 200 čuoggá) dahje ođđaáigásaš giellan (moderna språk 200–300 čuoggá) dahje vástideaddji sámegieloahppu doaibmi njuolggadusaid mielde. Sámegiela gáibádusa sáhttá maid deavdit sámegiela lohkanbadjeoahpuin, 30 oahppočuoggá, dahje vástideaddji oahpuin dahje ceavzit giellageahččaleami maid Sámi allaskuvla lágida. Jus lea eahpesihkarvuohta man dási gelbbolašvuohta ohccis lea, de ášši ovddiduvvo fágalaš árvvoštallamii ja meannuduvvo dán vuođul.
- Sisdoallu
Oahppofálaldat deattuha duohtavuođa- ja soabadanbarggu duogáža, váldogávdnosiid, ja mo dát bealit sáhttet implementerejuvvot formálalaš servvodatlaš struktuvrraide/ vuogádagaide. Studeanttat geat dán oahpu čađahit, ohppet kritihkalaččat geahččat servvodatlaš formálalaš struktuvrraid/ vuogádagaid ja daid duohta váikkuhusaid sámiide ja sámi servvoštallamii, duohtavuođa- ja soabadankommišuvnnaid gávdnosiid vuođul. Studeanta háhká maiddái máhtu dan juridihkalaš beali duohtavuođa- ja soabadanbarggus. Studeanttat besset geatnegáhtton čállinbarggu bokte čiekŋudit fáddái maid ieža válljejit duohtavuođa- ja soabadankommišuvnnaid bargguin.
- Gáibádusat beassat eksámenii
Čuovvovaš gáibádusat leat eaktun beassat eksámenii:
- Čálalaš bargu (gaskkal 2-4 siiddu)
- Čađahit ovtta njálmmálaš ovdanbuktima (joavkobargu)Gáibádusat galget dohkkehuvvon ovdal studeanta beassá eksámenii.
- Eksámen
Eksámen lea 5-beaivásaš ruovttueksámen mas studeanta čállá 7-9 siidosaš čállosa addojuvvon fáttá vuođul.
Árvosánit addojuvvojit ECTS vuogádaga mielde, mas A lea buoremus árvosátni ja E lea vuolemus ceavzinárvosátni. F árvosátni mearkkaša ahte ii leat ceavzán.