SAM 245 Sámi báikenamat ja nammapolitihkka
Oahpus guorahallojuvvo nammapolitihkka ja makkár vugiiguin nammapolitihka sáhttá dutkat.
- Oahppočuoggá: 10
- Diibmoplána ja deaivvadanplána: Time Edit
- Oahppoáigi: Ovtta lohkanbaji badjel
- Oahpahan- ja oahppanvuogit: Oahppu lágiduvvo neahttadoarjjaoahpahussan ja leat logaldallamat, hárjehusat, studeanttaid čálalaš barggut ja bargoseminára. Eanaš logaldallamat leat neahta bokte ja lohkanbaji áiggi leat guokte fysalaš deaivvadanvahku Sámi allaskuvllas, Guovdageainnus. Fysalaš deaivvademiide ii leat vejolaš searvat neahta bokte
- Oahpahus- ja eksámengiella: Davvisámegiella. Vurdojuvvo ahte studeanttat bastet lohkat eaŋgalasgielat lohkanmeari
- Ohcanwebas: Vállje 2135
- Sisabeassangáibádusat
Studeanta lea čađahan dahje čađaheame Sámegiela ja sámi girjjálašvuođa bachelorprográmma vuođđooahpuid ja giellafágalaš fágaoahpuid (gč. prográmmaplána) dahje sus leat vástideaddji alit dási oahput.
Sámegiela ja sámi girjjálašvuođa bachelorprográmma oppalaš sisabeassangáibádusat leat čilgejuvvon oahppoprográmmaplánas.
- Sisdoallu
Oahpus guorahallojuvvo nammapolitihkka ja makkár vugiiguin nammapolitihka sáhttá dutkat. Davviriikkaid nammapolitihka historjá ja dálá dilli leat vuolggasadjin, ja oahpus guorahallojuvvojit nammapolitihkkii guoskevaš dieđut erenoamážit sámi báikenamaid geahččanguovllus.
Oahpu áigge studeanttat válljejit man nu guovllu sámi báikenamaid, maid guorahallet nammapolitihkalaš geahččanguovllus oahpus oahpahuvvon metodologalaš ja teorehtalaš vugiiguin.
- Gáibádusat beassat eksámenii
Studeanta čállá ovtta unnimustá 6–8-siidosaš čálalaš barggu lohkanmeari, logaldallamiid ja/dahje čohkkejuvvon nammamateriála vuođul. Čállosa ulbmilin lea guorahallat sámi báikenammamateriála nammapolitihkalaš dutkanvugiin. Čálus ovdanbuktojuvvo bargosemináras, ja studeanta galgá maiddái fágalaččat kommenteret unnimustá ovtta mielstudeantta barggu.
Čálus árvvoštallojuvvo dohkálažžan/ii dohkálažžan, ja dat galgá leat dohkkehuvvon ovdal go studeanta beassá eksámenii.
- Eksámen
2-vahkkosaš čálalaš ruovttueksámen báikenammapolitihkkii guoskevaš fáttás. Eksámenčállosa guhkkodat lea 10–13 siiddu.
Árvvoštallan: Árvosátni A–F.
