Luonddufága 1, 1.-10. ceahkki – joatkkaoahppun vuođđoskuvlaoahpaheddjiide

• Oahppočuoggá: 30
• Diibmoplána ja deaivvadanplána: TimeEdit
• Oahppoáigi: Ovtta lohkanbaji badjel
• Oahpahan- ja oahppanvuogit: Oahpaheapmi čađahuvvot sihke deaivvademiid ja neahttaoahpaheami bokte. Oahpahan- ja oahppanvuogit leat logaldallamat, seminárat, joavkobarggut, iešheanalaš lohkkan, fágaidrasttideaddji barggut, reflekšuvdnabargu, fágamáhppa ja hárjehusat. Dát fága galgá gokčat máŋga iešguđetlágan fáttaid. Dát oahpahanvuohki gáibida ahte studeanta bargá iešheanalaččat ja nagoda plánet iežas bargoáiggi. Studeanttas lea vejolaš oažžot bagadallama sihke neahta bokte ja dalle go leat deaivvadeamit.
• Oahpahus- ja eksámengiella: Davvisámegiella. Guosselogaldallamat sáhttet leat dáro- dahje eŋgelasgillii.
• Ohcanwebas: Vállje 6037

Sisabeassangáibadusat 

• Čađahuvvon oahpaheaddjeoahppu mii addá gelbbolašvuođa oahpahit vuođđoskuvllas

 • Davvisámegielmáhttu 

Sámegiela gáibádusa sáhttá deavdit čuovvovaš vugiid mielde: Norgga joatkkaskuvllas sámegiella 1. dahje 2. giellan 2, Suoma logahagas eatnigielladutkkus dahje lohkan sámegiela vierrogiellan ja Ruoŧa gymnásas eatnigiellan (modersmål 200 čuoggá) dahje ođđaáigásaš giellan (moderna språk 200-300 čuoggá) dahje vástideaddji sámegieloahppu doaibmi njuolggadusaid mielde. Sámegiela gáibádusa sáhttá maid deavdit sámegiela lohkanbadjeoahpuin, 30 oahppočuoggá, dahje vástideaddji oahpuin dahje ceavzit giellageahččaleami maid Sámi allaskuvla lágida. Jus lea eahpesihkarvuohta man dási gelbbolašvuohta ohccis lea, de ášši ovddiduvvo fágalaš árvvoštallamii ja meannuduvvo dán vuođul.

Sisdoallu

Oahpu sisdoallu leat fágadisipliinnat luonddufágadidaktihkka,biologiija, fysihkka ja kemiija. Luonddufága galgá addit fágalaš ja fágadidákttalaš vuođu oahpahit luonddufága vuođđoskuvlla 1. luohkás 10. luohkkái. Oahpus galgá leat lagaš oktavuohta hárjehallamii ja studeanttat galget oahppat ieža dahje earáin ovttas ovddidit iežaset máhttu ja bargovugiid. Oahppu deattuha máhtu ja gálggaid mat ovdánahttet ohppiid progrešuvnna luonddufága vuođđofáttáin ja nu láhčet dilli joatkit fágalaš ovdáneami. Sámi perspektiivvat ja sisdoallu galgá leat oassin oahpu fáttáin gokko lea vejolaš ja ceavzilis ovdáneapmi boahtá ovdan eanaš fáttáin. Praktihkalaš bargovuogit vuoruhuvvojit, nugo iskkadeamit ja áiccamat olgun ja laboratorias ja árbevirolaš barggut.

Gáibádusat beassat eksámenii

Čuovvovaš gáibádusat galget leat dohkkehuvvon ovdal studeanta beassá eksámenii: 

• Oassálastán 80 % lágiduvvon oahpahusas deaivvademiin ja neahttaoahpahusas.
• Fágamáhppa: Bargobihtát maid fágaoahpaheaddji addá čuovvovaš fáttáin, galget dohkkehuvvot ja biddjot fágamáhppii:
  • Geologiija
  • Kemiija
  • Fysihkka
  • Biologiija
• Searvat fealtakursii ja čállit das raportta (sullii 600-700 sáni).
• Reflekšuvdnačálus (sullii 600-700 sáni) mas studeanta reflektere iežas oahppama luonddufágas ja čanastagaid kultuvrii vuođđuduvvon oahpahussii.
• Hábmet didákttalaš plána iešválljejuvvon fáttás ja
  • čađahit plána skuvllas dahje mielstudeanttaide
  • čállit didákttalaš árvvoštallanteavstta (gaskkal 2-3 siiddu)
  • ovdanbuktit plána ja árvvoštallamiid semináras.

Barggut árvvoštallojuvvojit dohkkehuvvon/ ii dohkkehuvvon.

Eksámen

Eksámen lea guovtti oasis: 1. 6-diibmosaš oktagaslaš čálalaš skuvlaeksámen (50 % deaddu loahpalaš árvosánis). 2. Njálmmálaš praktihkalaš eksámen (50 % deaddu loahpalaš árvosánis). Árvosánit addojuvvojit ECTS vuogádaga mielde, mas A lea buoremus árvosátni ja E lea vuolemus ceavzinárvosátni. F árvosátni mearkkaša ahte ii leat ceavzán.

Fágaplána Luonddufága 1, 1.-10. ceahkki – joatkkaoahppun vuođđoskuvlaoahpaheddjiide