DUO-1012 Bistevaš design
- Oahppočuoggá: 20
- Diibmoplána ja deaivvadanplána: TimeEdit
- Oahppoáigi: Ovtta lohkanbaji badjel
- Oahpahan- ja oahppanvuogit: Neahttadoarjjaoahpahus: Oahpus leat sihke fysalaš deaivvadeamit Sámi allaskuvllas ja neahttaoahpahus. Logaldallamiidda lea vejolaš oassálastit neahta bokte, muhto hárjehusat ja bargobájit gáibidit fysalaš searvama
- Oahpahus- ja eksámengiella: Váldo oahpahusgiella lea davvisámegiella. Logaldallamat eará sámegielaide, dáro- dahje ruoŧagillii dulkojuvvojit dárbbu mielde. Logaldallamat eaŋgalasgillii eai dulkojuvvo. Eará sámegielat studeanttaide geahččalit láhčit dili nu ahte sii sáhttet čállit bargguid ja oažžut oasi bagadallamis iežaset sámegillii.
- Ohcanwebas: Vállje 5117
- Sisabeassangáibádusat
• Dábálaš sisabeassangáibádusat alitohppui. Sisabeassanvuođđu sáhttá leat juogo oppalaš lohkangelbbolašvuohta (čađahan joatkkaskuvlla/logahaga/gymnása) dahje reálagelbbolašvuohta. Oppalaš lohkangelbbolašvuođa gáibádusat olgoriikkaohcciide bohtet ovdan GSU-listtus. Go oahppu lágiduvvo sámegillii, de olgoriikkaohcciide ii gusto dárogielagáibádus, vrd. Forskrift om opptak til høgare utdanning § 2-2 (6).
• Sámegielmáhttu.
• Duodje-, dáidda- dahje hábmengelbbolašvuohtaSámegiela gáibádusa sáhttá deavdit čuovvovaš vugiid mielde: Norgga joatkkaskuvllas sámegiella 1. dahje 2. giellan 2, Suoma logahagas eatnigielladutkkus dahje lohkan sámegiela vierrogiellan ja Ruoŧa gymnásas eatnigiellan (modersmål 200 čuoggá) dahje ođđaáigásaš giellan (moderna språk 200-300 čuoggá) dahje vástideaddji sámegieloahppu doaibmi njuolggadusaid mielde. Sámegiela gáibádusa sáhttá maid deavdit sámegiela lohkanbadjeoahpuin, 30 oahppočuoggá, dahje vástideaddji oahpuin dahje ceavzit giellageahččaleami maid Sámi allaskuvla lágida.
Duodje-, dáidda- dahje hábmengelbbolašvuođa gáibádusa sáhttá duođaštit čuovvovaš vugiid mielde: Norgga joatkkaskuvllas čađahan duodje-, dáidda- dahje hábmenoahpu, Suomas duodje-, dáiddadahje hábmensuorggi artesánaoahpu, Ruoŧa gymnásas čađahan estehtalaš- dahje sámeprográmma. Duodje-, dáidda- dahje hábmengelbbolašvuođa sáhttá maiddái deavdit jus lea maŋŋel joatkkaskuvlla čađahan unnimusat jagi duodje-, dáidda- dahje hábmensuorggi oahpu ámmátskuvllas dahje fágaskuvllas, dahje universitehta- ja allaskuvladásis čađahan unnimusat 15 oahppočuoggá duodje-, dáidda- dahje hábmensuorggi oahpu.
Jus ohccis ii leat formála gelbbolašvuohta fágasuorggis, de sáhttá ohcci maiddái duođaštit duodje-, dáidda- dahje hábmenfágalaš gelbbolašvuođa iežas bargguid bokte. Dasto galgá juogo sáddet sisa ja oažžut dohkkehuvvot: − Govaid unnimusat viđa duojis, dahje − 2-3 duodje-, hábmen dahje dáiddalaš prošeavttain, mat čujuhit kreatiivvalaš proseassaide, ovdamearkka dihtii portfolio Dárbbu mielde ovddiduvvo gelbbolašvuođa meroštallan fágalaš árvvoštallamii ja meannuduvvo dán vuođul. Sáhttá nai čađahuvvot ságastallan duodjegelbbolašvuođa árvvoštallama doarjjan.
- Sisdoallu
Oahppu fállá geavatlaš ja teorehtalaš vuođđodieđuid, maiguin viiddidit studeantta duddjoma ja hábmema (designa) máhttima. Oahpahusas vuodjut sierralágan duddjoma ja hábmema vugiid, teknihkaid, reaidduid ja ávdnasiid geahččaleapmái. Oahpus suokkardallat mainna láhkai bistevašvuođa dárbbut ja prinsihpat váldojuvvojit vuhtii duodjeárbevieru ávkinatnimis hábmema vuođđun. Oahpahusas deattuhuvvojit sámiid, árktalaš guovllu eamiálbmoga, duodjeárbevierut, mat lea hutkás bargama vuođđun.
- Gáibádusat beassat eksámenii
Ovdal beassá eksámenii, galgá studeanta: dahkat guokte duoji ja portfolio mas leat čuovvovaš barggut:
1. Čilgehus vuosttaš duoji dieđuid háhkamis, plánemis ja bargoproseassas.
2. Čilgehus nubbi duoji dieđuid háhkamis, plánemis ja bargoproseassas.
3. Teorehtalaš reflekšuvdnačálus iežas ovdáneamis oahppanjoksosiid ektui Fágaoahpaheaddji dohkkeha gáibádusaid beassat eksámenii.- Eksámen
Eksámen lea guovtti oasis:
1. Čájáhus mas leat studeanta portfolio ja duojit (deaddu 75% loahpalaš árvosánis) 2. Njálmmálaš eksámen (deaddu 25% loahpalaš árvosánis)Árvosánit addojit ECTS vuogádaga mielde, mas A lea buoremus árvosátni ja E lea vuolemus ceavzinárvosátni. F árvosátni mearkkaša ahte ii leat ceavzán. Muđui čujuhuvvo Sámi allaskuvlla loahpalaš árvvoštallan- ja eksámennjuolggadusaide.
