BASER Sámi servodatfága bachelorprográmma
Sámi servodatfága bachelor addá gelbbolašvuođa sámi servodaga organiseremis ja gelbbolašvuođa ovddidit sámi servodaga dárbbuid stáhta vuogádagas.
- Oahppočuoggá: 180
- Diibmoplána ja deaivvadanplána:TimeEdit
- Oahppoáigi: 3 jagi
- Oahpahus- ja eksámengiella: Davvisámegiella. Muhtun logaldallamat sáhttet leat dáro- dahje ruoŧagillii ja sáhttá dulkojuvvot sámegillii. Eaŋgalasgiella ii dulkojuvvo.
- Oahpahan- ja oahppanvuogit: Oahpus lea sihke fysalaš ja neahttavuđot oahpahus. Oahppan lágiduvvo deaivvademiid, studeantačoahkkanemiid, oahppomátkkiid, bagadallamiid ja daid gaskka neahttagulahallama bokte. Oahppoplánain lea dárkilat diehtu oahppoovttadagaid lágideami birra.
- Ohcanwebas: Vállje 9300
- Sisabeassangáibádusat
Dábálaš sisabeassangáibádusat alitohppui. Sisabeassanvuođđu sáhttá leat juogo oppalaš lohkangelbbolašvuohta (čađahan joatkkaskuvlla, logahaga dahje gymnása) dahje reálagelbbolašvuohta. Sámegielmáhttu.
- Sisdoallu
Oahppu addá vuđolaš dieđu ja máhtu sihke árbevirolaš ja almmolaš eanan- ja čáhcehálddašeamis, ja mo dát guokte hálddašanvuogi gulahallaba. Vuođđun máhtuide ja dieđuide lea sápmelaččaid gulahallan birrasiiguin ja sin vuoigatvuođat eatnamiidda ja čáziide. Studeanttat ohppet ákkastallat Sámiid iežaset birgenlágiid ja ovdánahttima mávssolašvuođa ovddas. Máhttovuođđu ákkastallamiidda leat sápmelaččaid iežaset práksisat, doahpagat, riekteáddejupmi, eallinoainnut ja muitalusat.
Sámis nugo eará servodagain lea dárbu beassat ovddidit iežaset áddejumiid ja rivttiid eanangeavaheamis. Go sápmelaččat álgoálbmogin leat unnitlogus riikkain gos ellet, dat mielddisbuktá dáistalemiid stuorraservodagain. Stáhta vuogádat lea huksejuvvon váldoservodaga kultuvra- ja riekteipmárdusa vuođul, ja dát buktá sámi álbmogii čuolmmaid ja dáistalemiid stuora servodagaid ektui. Sámis leat ollu dieđut mat čuvgejit movt álbmot oaidná iežas saji máilmmis, ja makkár oktavuođat das leat birrasiidda nugo eatnamiidda, čáziide, elliide ja muđui eará sivdnádusaide.
Oahpu fáttát leat earret eará:
- Ovdalaš sámi ealáhus- ja birgenlágit
- Sámi birasehtalaš vierut
- Almmolaš eanan- ja čáhce-hálddašeapmi sámi guovlluin, ja dan diehtovuođđu
- Árbevirolaš sámi ealáhusdoaimmat
- Sámi riekteipmárdusat
- Eamiálbmotfilosofiija
Jus leat jearaldagat mat gusket oahpposajeohcamii, ohcanvuogádahkii, sisabeassangáibádusaide jna., váldde oktavuođa oahppohálddahusain e-boastta bokte: oahppohalddahus@samas.no
