Muhtun áššiid lea buorre čoavdit ovdal go oahppu álgá. Oahpu álgima oktavuođas lea dávjá ollu mii dáhpáhuvvá, ja ollu áigi sáhttá sestojuvvot jus muhtun áššit leat juo čovdojuvvon.

Dáppe gávnnat muhtun praktihkalaš dieđuid mat leat ávkkalaččat dutnje gii leat ođđa studeanta dahje leat váldán vuostá oahpposajifálaldaga Sámi allaskuvllas.  

Orrunsadji ja mánáidgárdesadji

• Orrunsadji

Sis-Finnmárkku studeanttaid ovttastusas (SSO) lea vejolaš láigohit ásodaga studeanttahaddái. SSO:s leat oktiibuot 42 iešguđetlágan ásodaga mat leat várrejuvvon Sámi allaskuvlla studeanttaide. Sáhtát láigohit ásodaga sihke guhkit ja oanehisáigái. Lea ovdamearkka dihte vejolaš láigohit orrunbáikki dalle go lea deaivvadanvahku. Eanet dieđuid viessobálvalusa birra gávnnat dáppe: https://ssosamas.no/bolig/

• Studeanttamánáidgárdi

Studeanttaide geain leat mánát geat dárbbašit mánáidgárdesaji, leat sihkkarastojuvvon mánáidgárdesajit olles studerenáigodahkii. Lea nai vejolaš fitnet mánáidgárdesaji oanehisáigái go leat ovdamearkka dihte deaivvadeamit. Eanet dieđuid mánáidgárdesaji birra gávnnat dáppe: https://ssosamas.no/barnhage/

Sisaloggen StudentWebai

• Mana StudentWebii.
• Logget sisa seamma geavaheddjiin ja beassansániin go mainna ohcet ohppui Søknadswebas.
• Jus it muitte beassansáni de sáhtát diŋgot dan ođđasit nu ahte dat sáddejuvvo dan e-boastačujuhussii maid registrerejit go ohcet ohppui.
• Studeanttaide geain ii leat Norgga personnummár fertejit váldit oktavuođa oahppohálddahusain oažžun dihte fiktiiva Norgga riegádannummára (geavaheaddjinamma) ja beassansáni.
• Iskka ahte StudentWebas lea du rievttes boastačujuhus, telefovdnanummir ja e-boastačujuhus.
• Jus du namma ii leat registrerejuvvon riekta, de atte dieđu dan birra oahppohalddahus@samas.no čujuhussii. Bija mielddusin dokumentašuvnna mii duođašta du nama. 

Lohkanbadjedivada máksin

• Don gávnnat iežat lohkanbadjedivada rehkega StudentWebas, “Betaling / Payments” vuolde.
• Buot studeanttat mákset 500 ru. lohkanbadjedivada SSO:i ja ávnnasdivvaga Sámi allaskuvlii. Ávnnasdivada sturrodat vuolgá das makkár oahpus don leat, ja leat go ollesáiggestudeanta vai oasseáiggestudeanta. 

Máksináigemearri: 

• Čakčalohkanbajis: 01.09
• Giđđa lohkanbajis: 01.02

Leat go máksán lohkanbadjedivada eará studeantaovttastussii?

• Studeantaovttastuslága bokte sáhttet studeanttat geat eai ása oahppoásahusa lahka, válljet máksit lohkanbadjedivada studeantaovttastussii mas leat fálaldagat studeanta orrunbáikki lahka.
• Jus don leat studeantan máŋgga oahppoásahusas, de it dárbbat máksit lohkanbadjedivada eanet go ovtta studeantaovttastussii.
• Váldoprinsihppa lea ahte mávssát lohkanbadjedivada dan ásahussii gos anát bálvalusaid.
• Jus leat máksán lohkanbadjedivada eará ásahussii, de sáddet máksinduođaštusa oahppohálddahussii, de mii sihkkut lohkanbadjedivada máksingáibádusa.
• Fuomáš ahte vaikko it dárbbat máksit lohkanbadjedivada SSO:i, de fertet ain máksit ávnnasdivada Sámi allaskuvlii.

Studeantaregistreren

Don fertet máksit lohkanbadjedivada ja registreret iežat studeantan juohke lohkanbaji vai doalahat studeantavuoigatvuođa.

• Go leat máksán lohkanbadjedivvaga ja máksu lea boahtán midjiide, de beasat registreret iežat studeantan. Fuomáš ahte sáhttá ádjánit moadde beaivvi ovdal mii oažžut máksindieđu báŋkkus ja ovdal dasto beasat registreret.
• Don registerat iežat studeantan StudentWeb bokte.
• Go registreret ja dohkkehat progrešuvdna-/oahpahusplána (utdanningsplan), de automáhtalaččat dieđihuvvot oahpahussii ja eksámenii.
• Dárkkis ahte du progrešuvdna-/oahpahusplána ii leat guoros! 

Áigemearit: 

• Čakčalohkanbajis: 15.09
• Giđđa lohkanbajis: 15.02

IT-konto ja IT-veahkki

• Buot studeanttat fertejit ráhkadit IT-konto Sámi allaskuvllas vai beasat min dihtorbálvalusaid atnit, ee. Canvasii, studeanta e-boasta, eksámeniid čađahit WiseFlowas, čálihit, skánnet
• Don oaččut alccet FEIDE-geavaheaddji mii adno visot sisaloggemiidda, maiddái Studentbevis+ appai ja Eduroamai.
• Ávžžuhit du ráhkadit IT-konto buori áiggis ovdal oahppu álgá vai beasat vuogádagaide dalle go oahppu álgá.
• Dutnje galgá boahtit SMS-diehtu IT-konto ráhkadeami birra.
• Jus it leat ožžon SMS-dieđu, de mana ráhkadit IT-konto manuálalaččat. 

Dáppe oainnát movt ráhkadat IT-konto manuálalaččat: Ráhkadit Sámi allaskuvlla IT- konto

IT-support

Ávžžuhit muđui oahpásnuvvat min teknihkalaš čovdosiidda ovdal go oahppu álgá, nu go Office 365, Zoom, WiFi, prentenbálvalusaide ja nu ain. 

Loga eanet IT-čovdosiid birra dáppe: https://samas.no/se/a/it-support

IT-veahkki 
Jus dárbbašat veahki IT-bálvalusaide, de sáhtát váldit oktavuođa Sámi allaskuvlla IT-supportain:

• Čále e-boasta support@samas.no
• Fina ovdakantuvrras Diehtosiidda boađáhagas

Loatna ja stipeanda

Dáppe gávnnat dieđuid muhtin doarjjaortnegiid birra gos Sámi allaskuvlla studeanttat sáhttet oažžut stipeandda dahje loana: Studeanta árgabeaivi | Sámi allaskuvla

• Norgga loatakássii (Lånekassen) sáhtát sáddet ohcamuša ovdal go leat registreren iežat studeantan. Stipeanda ja loatna máksojuvvo automáhtalaččat go leat lohkanbadjedivada ja registrerejuvvon studeantan.
• Jus dárbbahat oahpposajiduođaštusa ohcamii, váldde oktavuođa oahppohálddahusain.

Canvas

Canvas lea oahpuid váldo gulahallanreaidu ja dohko biddjojit dieđut oahpu birra, lohkanmearri ja muđui eará dehálaš dieđut. 

• Don fertet ráhkadahttán alccet IT-konto ovdal beasat Canvasii.
• Don oaččut bovdehusa daidda Canvas-lanjaide mat gullet du ohppui.
• Jus it leat ožžon bovdehusa, de ii soaitte du Canvas-latnja vel almmuhuvvon. Du oahppokoordináhtor almmuha Canvas-lanja ovdal oahppu álgá.

Appa telefovdnii: 

• Ávžžuhit viežžat Canvas-appa mobiltelefovdnii ja aktiveret "push-dieđuid".
• "Push-dieđut" sáhttet leat ávkkálaččat vai oaččut ođđaseamos dieđuid, riedadusaid ja muittuhusaid ovttatmano.