Dutkanbeaivvit 2025 Panelaságastallan: Nuoraide oadjebas dilli
Dutkanbeivviid 2025 oktavuođas bovde Sámi Allaskuvla du čuovvut panelaságastallama.
Máret Eline Hætta láidesta panelaságastallama Nuoraide oadjebas dilli – Mo olahit oadjebasvuođa Sámi nuoraide? Ságastallamii servet earret eará nuorat, suohkandoavttir ja politihkkárat.
Mis lea maid eahketkafea ja Ayla Nutti doallá konsearttaža. Lágideapmi lea nuvttá ja rabas buohkaide.
Goas: Duorastaga 25.09 dii 18-20
Gos: Diehtosiida kantiinas
Bures boahtin!
Eambbo Dutkanbeivviid birra:
Dán jagi Dutkanbeivviid fáddá – dorvvolašvuohta – lea viiddis fáddá mii sáhttá dulkojuvvot iešguđet láhkai ja lea dehálaš fáddán viidát dutkanbirrasiin.
Fáddáválljema ulbmilin lea čalmmustahttit dilemmaid ja áššiid mat addet ođđa máhtu ja boktet áŋgiruššama. Dát fáddá sáhttá vuolggahit dehálaš ságastallama identitehta, kulturárbbi ja ceavzilvuođa birra eamiálbmotperspektiivvas.
Dutkanbeaivvit leat nationála, jahkásaš festivála man Norgga dutkanráđđi lágida juohke jagi 1995 rájes. Dutkanbeaivvit leat ásahuvvon nannet beroštumi dutkamii ja alit ohppui, ja čájehit mo dutkan guoská midjiide buohkaide árgabeaivvis.
Festivála lágiduvvo miehtá riikka universitehtaid, allaskuvllaid, dutkaninstituhtaid, girjerájuid, museaid ja ealáhuseallima oassálastiiguin.