Dutkanbeaivvit 2025 Digitála lunšalogaldallan: Eatnama mánát skuvlema bálgáid alde ja Lohkanlihkku
Dutkanbeivviid 2025 oktavuođas bovde Sámi Allaskuvla digitála lunšalogaldallamii Marikaisa Laitiin ja Laura Piritta Kotavuopioin.
Marikaisa Laiti logaldallá Eatnama mánát skuvlema bálgáid alde - Sámi mánáid identitehtta ja resiliensa nannet ásahusaid transformeremis.
Laura Piritta Kotavuopio logaldallá Lohkanlihkku - riikkaidgaskasaš Interreg Aurora-ovddidanprošeakta man ulbmilin lea nannet sámegielat mánáid ja nuoraid lohkangelbbolašvuođa.
Gos: Stealládat lanjas Diehtosiiddas ja digitálalaččat.
Diehtosiiddas guossohuvvo gehppes lunšaborramuš.
Dutkanbeivviid birra:
Dán jagi Dutkanbeivviid fáddá – dorvvolašvuohta – lea viiddis fáddá mii sáhttá dulkojuvvot iešguđet láhkai ja lea dehálaš fáddán viidát dutkanbirrasiin.
Fáddáválljema ulbmilin lea čalmmustahttit dilemmaid ja áššiid mat addet ođđa máhtu ja boktet áŋgiruššama. Dát fáddá sáhttá vuolggahit dehálaš ságastallama identitehta, kulturárbbi ja ceavzilvuođa birra eamiálbmotperspektiivvas.
Dutkanbeaivvit leat nationála, jahkásaš festivála man Norgga dutkanráđđi lágida juohke jagi 1995 rájes. Dutkanbeaivvit leat ásahuvvon nannet beroštumi dutkamii ja alit ohppui, ja čájehit mo dutkan guoská midjiide buohkaide árgabeaivvis.
Festivála lágiduvvo miehtá riikka universitehtaid, allaskuvllaid, dutkaninstituhtaid, girjerájuid, museaid ja ealáhuseallima oassálastiiguin.